सीमावर्ती गाउँ शिवरत्नपुर कोरोना सङ्क्रमणको हट स्पट

 

हसुलिया, १५ जेठ । कैलालीको सीमावर्ती गाउँ शिवरत्नपुर कोरोना सङ्क्रमणको हट स्पट बनेको छ । कैलारी गाउँपालिका-३ मोहना नदी पारि पर्ने सो गाउँमा पछिल्लो समय बढी सङ्क्रमण फैलिएको पाइएको हो ।

गाउँका प्रायः मान्छे बिरामी परेपछि ४९ जनाको स्वाब परीक्षण गर्दा ३४ जनामा कोरोना सङ्क्रमण पुष्टी भएको कोरोना विशेष अस्पताल बैजपुरमा कार्यरत स्वास्थ्यकर्मी कुसुम चौधरीले जानकारी दिए । "सो गाउँभरि सङ्क्रमण फैलिएको छ", उनले भने । "प्रत्येक घरघरमा मान्छे बिरामी परेका छन ।" शिवरत्नपुरमा लक्षणसहितको कोरोना सङ्क्रमण फैलिएको जनाइएको छ ।

सो गाउँ नजिकै भारतीय बजार चन्दन चौकी रहेको छ । अरु गाउँभन्दा पर र छुट्टै रहेको शिवरत्नपुरका मान्छे चन्दन्चौकी बजार गएकै कारण लक्षणसहितको कोरोना सङ्क्रमण फैलिएको हुन सक्ने बताइएको छ । आजै सो गाउँमा गएर सङ्क्रमितको अवस्था बुझ्नुका साथै औषधि पनि वितरण गरिने गाउँपालिकाका स्वास्थ्य शाखा प्रमुख वीरेन्द्र सापकोटाले बताए ।

पछिल्लो समय सो गाउँपालिकाको वडा नम्बर ३ मा बढी सङ्क्रमित फेला परेका छन । बढी सङ्क्रमित फेला परेको शिवरत्नपुर र भडरी टीसीएन डाडामा एक पटक फेरि स्वाब सङ्कलन शिविर राखेर कोरोना जाँच गरिने वडा अध्यक्ष कैलाश चौधरीले बताए ।पश्चिम टुडे