कविटा थारु भासामे "भात खेवै"कबो ट आपट्टि निहो!

 

✒️ गणेश वर्तमान 
बर्दिया

उ हेरो पहारसे बर्का सैलाप आगिल
हमार भासा,ढरम,संस्कृटि सब्जास पुहिम कहटा
हम्र जुन्हुँक ट्वारसे म्वार निक कैख उल्रटि
पुर्बैह्या डाडुभैया,डिडिबहिन्या पैल्ह आपनहन बचाउ ट
टब क्याकर निक बा फैसला करहो
पस्छिउँह्वा डाडुभैया,डिडिबहिन्या पैल्ह आपनहन बचाउ ट
टब क्याकर निक बा फैसला करहो
सैलाप डान बह निछ्वारटसम ट
डुन्हुँ जन्हँक जिन्गि रहक लाकफे
एक और जान्हँक हाँठ ट पक्रहिक परि ना
"भात खेवै?"टुँ कबो ट महि आपट्टि निहो
"भाट खैबो?"कहम ट टुहिनफे का आपट्टि ना?
खास म भासा बिबाड कर पर्ना  चिजफे ट निहो
आपन मनक बाट ब्यक्ट कर्ना माढ्यमकेल हो यि ट
टुँ त,थ,द,ध बोल्ठो उह लिखो आपट्टि निहो
मै निबोल्ठु ट निलिखम टुहिनफे का आपट्टि ना?
याकर मटलब टुँ फे ट थारु बोल्ठो,लिख्ठो
याकर मटलब मै फे ट थारु बोल्ठुँ ,लिख्ठुँ
हिमालमक हिउँफे हमा यिहाँ बाफ बन्जाइठ
ट टुहाँर म्वार बोलाइ फरक हुइल ट का अचम्म?
चाहा टुँ चिटौन्या,मोरङ्ग्या,पुर्बैह्या,डङ्गौरा,राना थारु बोलो
थारु ट सक्कु थारु हो काहुँ?
पैल्ह रुख्व छबट्के ट हङ्ग्या निपल्हिने हो काहुँ?
हङ्ग्या पल्हाइक लाक ट रुख्वा हुइक परि पैल्ह
टुँ आपन समुडाय भिट्टरके
टुँ आपन भासम महाभारत, रामायण लिखो
मै आपन समुडाय भिट्टरके
मै आपन भासम महाभारत,रामायण लिखम
टुँ आपन समुडाय भिट्टरके
टुँ आपन भासम आगत,शिरिषको फुल लिखो
मै आपन समुडाय भिट्टरके
मै आपन भासम आगत,शिरिषको फुल लिखम
टुँ आपन समुडाय भिट्टरके
टुँ आपन भासम तँ ,तिमी,तपाई,हजुर,व जय भुँडि लिखो
मै आपन समुडाय भिट्टरके
मै आपन भासम तँ,तिमी,तपाई,हजुर व जय भुँडि लिखम
टुँ आपन समुडाय भिट्टरके
टुँ आपन भासम घरको माया व नालापानिमा लिखो
मै आपन समुडाय भिट्टरके 
मै आपन भासम घरको माया व नालापानिमा लिखम
टुँ आपन समुडाय भिट्टरके
टुँ आपन भासम क्याटबरि टेल व लङ वाल्क टु फ्रिडम लिखो
मै आपन समुडाय भिट्टरके
मै आपन भासम क्याटबरि टेल व लङ वाल्क  टु फ्रिडम लिखम
टब् पो हमार लर्कन्हँक लर्काफे भासा चिन्हँहि
टब् पो हमा लर्कन्हँक लर्काफे हमा पैलक डुख,हमा इटिहास,हमा आझ्झुक बारेम पह्रहिँ
टुँ म्वार सैछ्छिक योग्यटम अँग्रि ठर्ह्याके
टुहाँर भासक बिकास ट निहुइ काहुँ
मै टुहाँर भासम अँग्रि ठर्ह्याके 
म्वार भासक बिकासफे ट निहुइ काहुँ??