कविता थारु भासा: "मुअल बाटि कि जिट्टि बाटि?"

 

👉गणेश वर्तमान

उ हमार बस्टिम छिरल

हमार भासा,संस्कृटि,ढरमके उँप्पर लाट ट्याकल

हमार उट्पटिक मिठक फ्यारल

अस्टिम्किक मिठक फ्यारल

डस्यक मिठक फ्यारल

घोरिघोराहन घोडाघोडि बनाइअस

माघहन माघि बनाडिहल

हमार मुँ एक अछ्छर निब्वालल

कहो हम्र मुअल बाटि कि जिट्टि बाटि?

लर्का पैलक छ /नौ डिनम

न्वारन कर कहल

छ मैन्हँम भाट खवाइ कराइ कहल

हम्र निकक झार उल्रटि मान्ढर्लि

डेवारिम भाइ टीका लगाइ कहल

माघम निस्राउ डिह छ्वार कहल

थारु बोल्लसे हिह्याइ लागल

आपन भासा ब्वाल कहल

हमार भास बन्ड्यम जराडिहल

हमार मुँ एक अछ्छर निब्वालल

कहो हम्र मुअल बाटि कि जिट्टि बाटि??

हमार माटि अछ्नल

हमार खुसि अछ्नल

हमार आपन जिन्गि अछ्नल

जसिक हम्र पसनके अछ्नल रठि

उ हमहिन भुँख्ल ढरल अढिकारसे

हम्र एक्चो बोल्लि ट मुँ सिडिहल

हाँठग्वारा बाहान्के काठ्मन्डु फाँक्डिहल

हम्र कुल्यम पठ्रा फँक्बोकेलफे

रिस्साके चभ्ल्याङ्ग करट पानी

हम्र मनै होक फे

हमार मुँ एक अछ्छर निब्वालल

कहो हम्र मुअल बाटि कि जिट्टि बाटि??